जत तालुक्यातील नुकसानग्रस्त शेतीची पाहणी; पालकमंत्री जयंत पाटील यांनी घेतली धावती भेट

जत/प्रतिनिधी: अतिवृष्टीमुळे राज्यातील शेतकऱ्यांचे मोठ्या प्रमाणात नुकसान झाले आहे. हे नुकसान भरून न निघणारे आहे. नुकसान झालेल्या पिकाचे पंचनामा करण्याचे आदेश संबंधितांना देण्यात आले आहेत. जत तालुक्यातील अतिवृष्टीमुळे नुकसान झालेल्या पिकांची पाहणी करण्यासाठी पालकमंत्री जयंत पाटील यांनी आज तालुक्यातील अचकनहळ्ळी, येळवी, मुचंडी, रावळगुंडवाडी, डफळापुर व जत या भागातील शेतकऱ्यांच्या बांधावर जाऊन तेथील परिस्थितीची पाहणी केली. जत येथे आल्यानंतर ते पत्रकारांशी बोलत होते, शेतकरी सध्या दुहेरी संकटात सापडलेला आहे. त्यांना दिलासा देऊन मार्ग काढण्याचा प्रयत्न राज्यशासन करणार आहे. सांगली जिल्ह्यातील खानापूर, आटपाडी व जत या भागाचा दौरा केला आहे. त्यानुसार नुकसानीचे पंचनामे प्राप्त झाल्यानंतर शेतकऱ्यांना मदत देण्यासंदर्भात निर्णय घेण्यात येईल. शेतकऱ्यांना दिलासा देण्यासाठी राज्य सरकार प्रयत्नशील आहे. राज्यात वेगवेगळ्या भागात अशी परिस्थिती निर्माण झाली आहे. राज्य सरकार याचा एकत्रित पाने विचार करेल. अशी माहिती पालकमंत्री जयंत पाटील यांनी जत येथे पत्रकारांशी बोलताना दिली. 

यावेळी कर्नाटकातील तुमची बबलेश्वर योजनेमधून जत तालुक्याच्या पूर्व भागाला पाणी देण्यासंदर्भात चर्चा केली असता ते म्हणाले की, त्या संदर्भात अध्याप निर्णय झालेला नाही. पाणी देण्यासंदर्भात चर्चा सुरू आहे. कर्नाटक शासनाकडून सकारात्मक प्रतिसाद मिळाल्यानंतर चर्चा करून अंतिम निर्णय घेतला जाईल. असेही पालकमंत्री जयंत पाटील यांनी यावेळी बोलताना सांगितले. त्यांच्या समवेत पाहणी दौऱ्यात आमदार विक्रम सावंत, तालुका कृषी अधिकारी हनुमंतराय मेडेदार,  प्रांताधिकारी प्रशांत आवटे, तहसीलदार सचिन पाटील, तालुका राष्ट्रवादी अध्यक्ष ऍड. दोडमनी, युवक राष्ट्रवादीचे अध्यक्ष उत्तमशेठ चव्हाण, प्रकाश जमदाडे, रमेश पाटील, सिद्धू शिरसाड, ऍड. चनाप्पा होर्तीकार, सुरेश शिंदे, मच्छिंद्र वाघमोडे, मंसूर खतीब, शिवाजी शिंदे, स्वप्नील शिंदे, प्रवीण जाधव आदीजण उपस्थित होते.